“პოლონეთის ხელისუფლების მტრული დამოკიდებულება სექსუალური უმცირესობების მიმართ ქვეყანას რთული გამოწვევების წინაშე აყენებს და არაკეთილსასურველი საინვესტიციო და სამხედრო გადაწყვეტილებებისკენ მიჰყავს”, _ განაცხადა პოლონეთში აშშ–ის ელჩმა ჯორჯეტ მოსბახერმა ინგლისურენოვანი გამოცემა Polish Armed Forcec New–ისთვის მიცემულ ინტერვიუში.
ამერიკელმა დიპლომატმა კომენტარი გააკეთა პოლონეთსა და დასავლეთ ევროპის ელიტას შორის კონფლიქტზე ლგბტ თემის გამო. და, თუ ბრიუსელმა ევროკომისიის ხელმძღვანელ ურსულა ფონ დერ ლაიენის პირით ქარაგმებით ილაპარაკა ვარშავის მიერ “კანონის უზენაესობის” დარღვევაზე, ამერიკის ელჩმა პირდაპირ განაცხადა, რომ პოლონეთის ხელისუფლების მიერ ლგბტ თემის მიუღებლობის გამო ქვეყანას სერიოზული პრობლემები შეექმნება საერთაშორისო დონეზე.
“პოლონეთს დასავლეთში აქვს რეპუტაცია ქვეყნისა, რომელიც მტრულად არის განწყობილი სექსუალური უმცირესობების მიმართ. ეს გამოიწვევს არაკეთილსასურველ საინვესტიციო გადაწყვეტილებებს. ეს, აგრეთვე, გავლენას იქონიებს სამხედრო საკითხებზე. საიდუმლო არავისთვის არის, რომ აშშ-ის კონგრესმენები ჩართულნი არიან ლგბტ თემის საქმეებში და ჩვენი კონგრესი, სხვა საკითხებთან ერთად, წყვეტს სამხედრო საკითხებსაც”, _ განაცხადა მოსბახერმა.
მან აღნიშნა, რომ პატივს სცემს პოლონეთს, როგორც კათოლიკურ ქვეყანას, შემდეგ კი ასე მიმართა პოლონეთის ელიტას: “მიუხედავად ამისა, თქვენ უნდა იცოდეთ, რომ ცდებით, როცა საქმე ეხება ლგბტ-ს. ადამიანის უფლებები უნივერსალურია, დომინაციური ეკლესიის მიუხედავად”.
eadayli.com–ზე გამოქვეყნებული მასალის მიხედვით მოამზადა
ნიკა კორინთელმა
