ამერიკელთა ცინიზმი

პენტაგონმა სირიასა და ერაყში კოალიციის მიერ განხორციელებული დაბომბვების შედეგად დაღუპულთა რაოდენობა თითქმის ათჯერ შეამცირა

აშშ–ის თავდაცვის სამინისტრომ ყალბი მონაცემები გამოაქვეყნა სირიასა და ერაყში აშშ–ისა და მისი მოკავშირეების მიერ განხორციელებული ოპერაციების შედეგად დაღუპულთა რაოდენობის შესახებ _ მათი რაოდენობა თითქმის 10-ჯერ არის შემცირებული.

ამა წლის აპრილის ბოლოს ოპერაცია “ურყევი სიმტკიცის” გაერთიანებულმა სარდლობამ მსოფლიოს საზოგადოებრიობას წარუდგინა მოხსენება ერაყსა და სირიაში მშვიდობიანი მოსახლეობის მსხვერპლის შესახებ. აშშ-ის მიერ შექმნილი კოალიციის გენერლების აზრით, 2014 წლის აგვისტოდან დღემდე სირიასა და ერაყში განხორციელებული სამხედრო ოპერაციების შედეგად (20 205 ავიადარტყმა) დაიღუპა 352 მშვიდობიანი მოქალაქე.

ციფრები, რომლებიც მოყვანილია ოპერაცია “ურყევი სიმტკიცის” გაერთიანებული სარდლობის მოხსენებაში, ეჭვს იწვევს, რადგან კოალიციის მიერ განხორციელებული 20 205 ავიადარტყმის, სულ ცოტა, 30% მოდიოდა მჭიდროდ დასახლებულ კვარტლებზე ისეთი დიდი ქალაქებისა, როგორიც არის სირიაში რაკა (300 ათასზე მეტი მცხოვრები) და ერაყში _ მოსული (1,5 მლნ კაცი). ამ ქალაქებში მცხოვრებთა საერთო რაოდენობა 1,8 მლნ–ს აჭარბებს, თანაც საომარი მოქმედებების (დაბომბვის) დაწყების წინ მშვიდობიანი მოსახლეობის ევაკუაცია არ მომხდარა.

ამიტომ, ამერიკული კოალიციის ძალების მიერ განხორციელებული დაბომბვის ინტენსივობიდან გამომდინარე, მოხსენებაში მოყვანილი ციფრები, რბილად რომ ითქვას, შემცირებულია, ხოლო პირდაპირ თუ ვიტყვით, ბანალური ტყუილია.

ვებგვერდ Airwars.org–ის მონაცემებით, ოპერაცია “ურყევი სიმტკიცის” დაწყებიდან დღემდე 3 ათასი მშვიდობიანი მოქალაქე დაიღუპა. ერაყული ვებგვერდი IBQ (Iraq Body Qoynt)-ი კი უფრო მეტი დაღუპულის შესახებ იუწყება. სირიაში მსხვერპლის ზუსტი რაოდენობა ჯერჯერობით დადგენილი არ არის, მაგრამ, სპეციალისტთა აზრით, არანაკლებია ერაყში დაღუპულებზე.

მხოლოდ ამა წლის მაისის დასაწყისში ერაყის სხვადასხვა ქალაქში, კოალიციის მიერ განხორციელებული სამხედრო მოქმედებების შედეგად, 63 ადამიანი დაიღუპა, მათ შორის _ 9 ბავშვი. აღსანიშნავია, რომ ადამიანები მხოლოდ დაბომბვის შედეგად არ დახოცილან, იშვიათი არ არის შემთხვევა, როცა კოალიციის წარმომადგენლები მშვიდობიან ადამიანებს ცეცხლსასროლი იარაღიდან ესვრიან _ ჰგონიათ, რომ ისინი “ისლამური სახელმწიფოს” მებრძოლები არიან. მაგალითად, 2017 წლის 1 მაისს ქალაქ მოსულის ერთ–ერთ გათავისუფლებულ რაიონში კოალიციის ქვედანაყოფების “ინსტრუქტორებმა” ორი ახალგაზრდა გამოასალმეს სიცოცხლეს, როცა მათ სამხედროების მიერ ინგლისურ ენაზე გაცემული ბრძანება არ შეასრულეს.

მოამზადა ლუკა მაისურაძემ