მთავარი საქართველო რას ყიდის და ყიდულობს საქართველო

რას ყიდის და ყიდულობს საქართველო

820
გააზიარეთ
რას ყიდის და ყიდულობს საქართველო

დიპლომატიური ურთიერთობის გაწყვეტის მიუხედავად, რუსეთი საქართველოს ერთერთ მნიშვნელოვან სავაჭრო პარტნიორ ქვეყნად რჩება. 2018 წლის იანვარნოემბრის მდგომარეობით, საქართველოს 10 უმსხვილეს სავაჭრო პარტნიორ ქვეყანას შორის მეორე ადგილზე იმყოფებოდა რუსეთი, რომელთანაც სავაჭრო ბრუნვის მოცულობამ საანგარიშო პერიოდში მილიარდ 254,9 მლნ აშშ დოლარი შეადგინა.

გთავაზობთ იმ ტოპ-5 პროდუქტს, რომლებსაც ყველაზე მეტი რაოდენობით ვყიდით რუსეთში და ასევე, რომელიც იქიდან შემოგვაქვს. მიმდინარე წლის 11 თვეში საქართველოდან რუსეთში გატანილი უმსხვილესი სასაქონლო ჯგუფი იყო ფეროშენადნობები, რომლის ექსპორტმაც 120,1 მლნ დოლარი შეადგინა; მას მოსდევს ყურძნის ნატურალური ღვინოები _ 105,1 მლნ დოლარით; მე-3 ადგილზე კი 45,2 მლნ დოლარით მინერალური და მტკნარი წყლებია; მე-4 და მე-5 პოზიციებს სპირტიანი სასმელები და ცენტრიფუგები იკავებენ, შესაბამისად, 19 მლნ და 13,5 მლნ დოლარით. რაც შეეხება რუსეთიდან იმპორტს, უმსხვილესი საიმპორტო ჯგუფი ნავთობი და ნავთობპროდუქტები იყო.

იანვარ-ნოემბერში საქართველოში რუსეთიდან 187,2 მლნ დოლარის ღირებულების აღნიშნული პროდუქტი შემოვიდა. მე-2 ადგილზეა ხორბალი, რომლის იმპორტმაც 89,5 მლნ დოლარი შეადგინა; მას კი 35,6 მლნ დოლარით ქვანახშირის კოქსი და ნახევარკოქსი მოსდევს; რუსეთიდან საიმპორტო პროდუქტების ტოპ ხუთეულში მე-4 და მე-5 პოზიციებს მზესუმზირის ზეთი და ტელეფონის აპარატები ინაწილებს, შესაბამისად, 30,2 მლნ და 27,4 დოლარით.

2018 წლის იანვარ-ნოემბერში საქართველოში საქონლით საგარეო სავაჭრო ბრუნვამ (არადეკლარირებული ვაჭრობის გარეშე) 11,3 მლრდ აშშ დოლარი შეადგინა, რაც წინა წლის შესაბამისი პერიოდის მაჩვენებელს 18,6 პროცენტით აღემატება.

“საქსტატის” მონაცემებით, აღნიშნულ პერიოდში 24%-ით გაიზარდა ექსპორტი და 3 მლრდ აშშ დოლარს მიაღწია, ხოლო იმპორტი 16,8%-ით გაიზარდა და 8,3 მლრდ აშშ დოლარს მიაღწია.

აღსანიშნავია, რომ საქართველო ყველაზე დიდი რაოდენობით სპილენძის მადნებსა და კონცენტრატებს ყიდის, მას მოსდევს მსუბუქი ავტომობილები, მე-3 ადგილზე კი ფეროშენადნობებია, მე-4 და მე-5 პოზიციებს ყურძნის ნატურალური ღვინოები, სიგარები და სიგარეტები ინაწილებს.

რაც შეეხება, ტოპ-5 საიმპორტო პროდუქტს, ყველაზე დიდი რაოდენობით ვყიდულობთ ნავთობსა და ნავთობპროდუქტებს, მე-2 ადგილზეა მსუბუქი ავტომობილები, ხოლო მესამეზე _ სპილენძის მადნები და კონცენტრატები, მე-4 და მე-5 პოზიციებს კი დაფასოებული მედიკამენტები, აირები და აირისებრი ნახშირწყალბადები იკავებს.

“ბიზნესპრესნიუსის” მიხედვით მოამზადა

ლუკა მაისურაძემ

 

გააზიარეთ

დატოვეთ კომენტარი

Please enter your comment!
Please enter your name here